كتب:سمير الشحيمى
الكل مجتمع فبيت سلطان أعياله وأحفاده والكل مستانس رقية
وبناتها وزوجات أولادها معاها بالمطبخ يجهزون وجبة العشاء
والعيال يلعبون بالحوش والرياييل بالمجلس حد يلعب ورقه وحد
يتابع تلفزيون وسلطان ومبارك يسولفو
حسن : خبرتك ماتقدر علي بلعب السبيده يا حمودي وهذا القيم حقي
محمد: ياخي خالي فيصل خبرتك لا تطلع إذا ماعندك كروت كنا بنخسرهم
فيصل: قلت يمكن صغار الأرقام معاك واللعب معاي كان زين والجوكر الملون عندي
حسن: ها خالي بدر شفت كيف اضبطك
بدر: كفو عليك الذيب
يضحكون ومحمد طلب دور ثاني يرد اعتباره
سلطان: مبارك أشوف مسقط وايد ماخذه وقتك وماتجي وايد البلد
مبارك: الشغل كثير بمسقط والبيع ممتاز
سلطان: الله يفتح عليك ويرزقك بس لا تنسى عندك أعيال يبون وجود أبوهم عندهم
مبارك : ترا أنا ما مقصر من فتره لفتره أجيهم
سلطان: تجيهم زياره كنك تزور حد من ربعك
مبارك: شمعه شكتلك بشي؟
سلطان: شمعه أسألها تقول كل الأمور زينه بس أنا أبو وأعرف إذا أعيالي مرتاحين أو لا
مبارك: لا تحاتي ياسلطان الأمور طيبه أهم شي أهتم بصحتك وعافيتك
سلطان:الله المستعان
وفي المطبخ رقية وبناتها يجهزون العشا
رقية: عويش خلصتي من تحميسة البصل والطماط؟
عايشه: أيوه خلاص جاهزه واللحين أساعد مريم
شمعه: الدجاج على الفرن ماباقي شي وراح تجهز
رقية: يالله شدو حيلكم عشان نخلص
شوي ودخل البيت خميس وزوجته أماني واكتمل الحضور وجهز
العشا وجهزت السفره واتعشى الجميع وبعدها جلس الكل يتسامرون
وأستأذن سلطان من الجميع بيدخل ياخذ أدويته وينام فقامت رقيه
تعاونه فقال لها جلسي أريد شمعه هيه اللي تعاوني وراحت شمعه
معاه ودخل غرفته وبدل ملابسه وعطته شمعه أدويته وقال يبيها
تهمزله ريله يحس بألم
وسوت له شمعه مساج لريوله
سلطان : تسلم إيدك يابنتي ما بغيت أتعب أمك حتى بديت أستحي أقول لها همزي ريولي أو هاتي وجيبي وحطي
شمعه: كلنا فداك وتحت ريولك نخدمك
سلطان: حبايبي إنتوا
شمعه : إنته ماقصرت معانا ربيتنا وصرفت علينا وماخليت لنا قاصر وجى الوقت نرد لك جزء من جمايلك علينا
سلطان : أنتوا قطعه من روحي
شمعه:الله يقدرنا أن نسعدك أنت وأمي
سلطان: كيف مبارك معاك؟
شمعه: ما شي حاله دام العيال ماقاصرنهم شي
سلطان : أنا عارف يابنتي أن مبارك وايد مقصر بوجوده معاكم وأحس بكل مره أنا السبب بهالشي
شمعه: لا يا أبوي لا تقول هالكلام بالعكس أنا ماخذيت إلا نصيبي إلي كتبه الله لي وراضيه فيه
سلطان: أنتي ما تتشكي بس أنتي بنتي وأحس فيك والبيت شالتنه براسك من شغل وتنظيف وخدامه ماعندك وتربية الاعيال وأم مبارك بروحها حرمه نكديه ومحد يتحملها وأنتي أدارينها أشوف حالك شكلك من التعب متغير ومرهقه وماتبي مني أتلوم أن أنا ورطك بشي مالك دخل فيه
شمعه: أنا راضيه وصابره وإذا تحبني لا تفكر بأي شي غير صحتك وعافيتك.
سلطان: بارك الله فيك يا الغاليه
وبعد السهره رجع كل واحد بيته ومبارك في غرفته مع شمعه : رحت تشوف عمتي بغرفتها؟
مبارك: أيوه حصلتها نايمه
شمعه: مبارك تراني تعبت من أمك وطلباتها وشغل البيت وعيالك محتاجين خدامه
مبارك :أنتو بالبيت أربع أشخاص حق شو الخدامه بعد.؟
شمعه: الشغل كله على راسي ماتفهم علي والدتك بروحها يبالها شخص يخدمها وطلباتها كثيرة وكبيره بالسن وماتعودت أرد على إلي أكبر مني من غير أعيالك ودروسهم وطباخ وتنظيف والبيت كبير كان كل واحد ينظف قسمه اللحين محد فضطر انظف ولا بينترس البيت أغبار عشان كذيه لابد تكون في خدامه يا تنظف البيت يا أقل شي تكون ترعى عمتي
مبارك : يا كثر ما تتشكي عشان كذيه ما أحب أجي وايد عندكم طلباتكم ماتخلص
شمعه: نطلب أبسط حقوقنا قلت طلباتكم وايد اتعبني ومع بدريه طلباتها أوامر نشوفك بالشهر مره اللحين خلي أعيالك قبل يشوفوك نفس باقي الأبهات
مبارك: والله ما أحيد إنه مقصر معاهم بشي مصروفهم معهم أسبوعياً
شوي دق باب غرفتهم كانت ريماس
شمعه: هلا حبيبتي تعالي شو تبي؟
ريماس: كنت أريد أبوي
مبارك: شو تبي؟
ريماس: شو رايك بكره نطلع طلعه كذا صوب وادي حيبي ونتغدا برا
مبارك: أسميك فاضيه أنا عندي شغل واايد باكر مافاضي موجود عندكم السايق خليه يوديكم وطلعو رحلتكم مالازم أكون موجود
ريماس: إن شاء الله أبويه تصبح على خير
وطلعت ريماس وهيه ماخذه بخاطرها
شمعه:شفت هذا اللي ناقصهم وجودك الفلوس عمرها ما تغطي مكان غياب الأب والأم وشفت وسمعت بعينك بنتك محتاجه وجودك
مبارك: أنا أشتغل وأتعب عشان أوفر لكم لقمة العيش والحياة الطيبه وبخصوص الخدامه بقدم على طلب عماله منزليه بتكون حق أمي مب حقك
شمعه: عادي أهم شي أنه تقوم بخدمة أمك مب كل شي عليه
مبارك: عساه خير يالله أنا بنام باكر عندي شغل وبعدها راجع مسقط
وفي غرفة ريماس وهيه تتكلم تلفون مع باسل
باسل:وينك أتصل عليك وماتردي؟
ريماس: خبرتك بكون بيت جدي سلطان والكل مجتمع كيف تبي أرد عليك
باسل: شو أسوي اشتقت لصوتك
ريماس: لا والله ماصار لنا يومين نسولف مع بعض
باسل: أنتي تقولي يومين بس أنا من أول مره شفتك بالباص وأنتظر اليوم اللي أكلمك فيه
ريماس: أشوفك من المرايا تجلس أطالع بس ماعرف على من عينك
باسل: عليك أكيد تعددت الوجوه بس اللي جذبني أنتي .
ريماس لحضت صمت من الخجل
باسل: وين رحتي؟
ريماس : موجوده أسمع كلامك
باسل: لا والله وشو أخبارك الثانيه
ريماس: متضايقه أبوي كله مشغول وماكنه موجود بحياتنا أساساً هو ماموجود بس بلاسم
باسل: ولا تحطي فخاطرك بكون أنا الأب والصديق والحبيب
وسوالف طول الليل بين العشاق
ومرت الأيام ووصلت الخدامه فبيت شمعه ولكن أم مبارك ما راضيه حد يخدمها غير شمعه والخدامه تنظف البيت وشمعه متصبره على خدمة أم مبارك ولسانها اللي مايوقف أذيه في شمعه ومسعود سجل بنادي الولايه بيصير لاعب بالمراحل السنيه وريماس كل يوم تتواصل مع باسل ويتلاقون بباص المدرسه وتعلقوا ببعض وايد
وفي يوم وكان ليل صرخت الخدامه تنادي شمعه طلعت شمعه من غرفتها مسرعه حصلت الخدامه تأشر على أم مبارك كانت أم مبارك طايحه على الأرض بسرعه شمعه كلمت السايق وجى ووصلوها المستشفى وفي غرفة الطواريء طلع الدكتور
شمعه:طمني دكتور شوفيها عمتي؟
الدكتور: للأسف العيوز جتها جلطة بالراس
اقراء أيضا:بين الشموع…الفصل الخامس والعشرين
يتبع…
