بين الشموع
بقلم *سميرالشحيمي*
الفصل الثاني والعشرين
يوم الجمعه من بعد صلاة الجمعه وفي بيت مبارك وتحديدا بغرفة شمعه تتجهز بتسير بيت أهلها متجمعين إخوانها وأهلها على الغدا رن تلفونها أمها رقيه متصله عليها أن العايله اليوم مجتمعين وحاجزين في الشاليه وملتقاهم هناك جميع بدل البيت
خبرت مبارك اللي كان توه واصل من برا غير ملابسه وطلع هو وشمعه وراحو للشاليه وكان الكل مجتمع هناك ودخلت شمعه مع الحريم ومبارك جلس مع الرياييل واليهال يلعبون كوره وبلالعاب وجى وقت الغدا والكل تغدا والعصريه الكل نزل الحوض يسبح وفي مكان خاص معزول حوض سباحه لنساء والكل أستمتع بوقته وصار الليل وشبو الرياييل النار عشان الشواء
رقيه: أحلى شي برحله أن الطبخ والشوا على رياييل
الجده صبيحه : يحق للحريم يرتاحن من شغل البيت ولو يوم وحده
باسمه: أبو العيال يتضايق لما أقوله قوم سوي لنا مشاوي يقول ما أعرف وهو لما يطلع مع ربعه رحله يبدع
حفيضه: كلهم جيه الرياييل فالبيت الطفل الكسول وبرا البيت الشيف أسامه
يضحك الجميع
وعند الشباب يسوون الشاويه من لحم ودجاج وسلطان وجماعته متجلسين بجلسه برا المجلس والجو حلو ونسيم بارد يلعبون دومنه
سلطان : وهاي آخر حبه وخسارتك يامبارك
مبارك يضحك : من يوم يومك وأنت لعبتك الدومنه وتغلب اللي ما ينغلب.
خميس : ماعليك منه تعال نلعب مره ثانيه وشوف من راح يفوز
ياسر : عاد أنته مصدق نفسك أول واحد مطلعنك سلطان
وعند شباب اللي يشوون محمد يطالع مبارك وهو متضايق يكلمه حسن :محمد بس خلاص اللي صار صار الموضوع طاف عليه سنه إنسى خلاص
محمد: ما أطيقه ما أبلعه من استوت هاي السالفه أخ بس أجلس بالسجن ولا نستوي لعبه بيد مبارك
حسن: تأكد اللي سوته أختك شمعه عشان تنقذك وبنفس الوقت تنقذ أبوك
محمد: لا تجلس تكرر كلام يقوله أبوي هالشي مايقنعني ولا أريد اقتنع فيه
فيصل زوج خالتهم باسمه: محمد حط نفسك مكان أبوك شو راح تسوي وولدك بالسجن وانت بنفس الوقت مطلوب شو الحل اللي عندك؟
محمد: أحافظ على بيتي وخلي ولدي يتحمل غلطه واتحمل غلطي
بدر زوج خالته حفيضه: الكلام سهل بس من يصير معاك عايله وأعيال وزوجه بتعرف شو يعني التضحيه
محمد: ماريد حد يجلس ينصحني ويقنعني
حسن: أنت ريال حافظ كتاب الله وادرس تربية إسلاميه والحياه يسر مب عسر الله يكون في عونك
سلطان: يا اعيال كيف خلصتوا العشا ولا بس تبربرو
محمد: بنخلص قريب صبركم علينا
شمعه ومع بنات عمها مرن من جدام مجلس الشباب نادت شمعه حسن وراح حقها : هلا فيك أخوي حسن شحالك طمني عليك من فتره ماتلاقينا
حسن: أنا بخير الحمد لله أنتي شو أخبارك طمنيني عليك وعلى احوالك
شمعه: الحمد لله على كل حال مع الوقت الواحد يتعود
حسن : أهم شي إنك بخير لك وحشه يا كتكوته
شمعه تنادي محمد ولكن مطنش مايرد عليها
حسن :مشغول مع الدخان والشوي
شمعه: بعده ماخذ بخاطره من سالفة زواجي
حسن: لا تحطي ببالك مصيره مع الوقت بيقدر وبيفهم أنتي أصغر وحده فينا بس أعقل وحده ربك عطاك فكر وعقل وتدبر للأمور أحسن عن أي واحد فينا
شمعه:انتو اخواني مالي غنا عنكم انتم عزوتي
وصار وقت العشا واتعشى الجميع وعلى الساعه ١٢ بليل الكل رجع بيته وشمعه أستأذنت من مبارك تنام فبيت أهلها لأن موجوده أختها عايشه ومريم
وفي بيت سلطان وبغرفة سلطان: اليوم كان متعب بصراحه
رقيه : هيه والله بس أستانسنا وايد واللمه حلوه
سلطان : هيه نعم بس ولدك محمد بعده للحين حاط في راسه موضوع شمعه ومبارك
رقيه: بيتعبنا هالولد ماعرف شو أسوي معاه ماراضي يفهم
سلطان: أخته تناديه تبي تسلم عليه مطنشها ما حبيت أدخل عشان مايكبر الموضوع
رقيه: أعتقد جى وقت انزوجه على الأقل بينشغل عن أخته بزوجته
سلطان : شور طيب باكر قبل عن يروح مسقط اسأليه واطقسي الوضع
رقيه: ولا يهمك باكر بسأله تصبح على خير
وفي غرفة محمد وحسن كان حسن يجهز ملابسه العسكريه ومحمد يقرأ كتاب للدراسات الإسلاميه
حسن: الحركة اللي سويتها مب حلوه
محمد: أي حركة تقصد؟
حسن: من كثرهن اللي سويتهن ماتعرف وتقول أي حركة؟ اقصد أختك شمعه تناديك تبي تسلم عليك وطنشتها
محمد: ماكنت منتبه وماسمعتها عدل
حسن: إلا سمعتها بس تحب تنزل من قدرها عسب أنت أخونا العود وهيه أختك كنها مسويه جريمه
محمد : أيوه جريمه
حسن: الزواج صار جريمه بنظرك؟
محمد : إذا الزوج مبارك الصايغ أيوه يعتبر جريمه استغلال ضعف الناس جريمه
حسن : الحكي ضايع معاك براحتك
محمد:أحسن تكرمنا بسكوتك
وفي غرفة البنات وكل َحده تحكي قصتها وشو صار معاها
عايشه: بس تصدقن أن مرات في مراجعين مغثه تحسه آخر حبه بالعالم خاصه إذا جايب معاه حد مريض ويبي يدخل قبل الكل أنتظر ياخي في ناس قبلك لا أنا بدش أنا أعرف مدير المستشفى يقهروني
شمعه: وكيف بخصوص إصابات كورونا بالفعل أن خلاص مافي تسجيل حالات؟
عايشه: حالات كورونا قليله بس مو معناته إنها مش موجوده لازم الواحد يمشي على التدبير الاحترازيه
مريم: تدخلين غرفة العمليات وكذا وتساعدي الأطباء؟
عايشه: لا أنا ممرضه بقسم الطبيب العام وطالبه أسير قسم الولاده صح بخصوص الولاده مبروك شمعه بلي فبطنك أخيرا بنصير خاله عايشه وخاله مريم
شمعه: خبرتك أمي أكيد أيوه حامل بالشهر الثاني والله يتمم على خير
عايشه: ربي يسهل أمرك يارب واذا احتجتي أي شي مشوره مساعده اتصلي علي
شمعه: ولا يهمك حبيبتي ماتقصري
مريم : أنا من التعب والإرهاق بقول باي تصبحون على خير
يتبع…
