بين الشموع
بقلم : سميرالشحيمي

الفصل الثالث

فتح سلطان باب بيته ودخل الأغراض ورقية تمشي خلفه وبحضنها الضيفة الجديدة (شمعه).

عايشه ومريم يتجهن لأمهن التي إحتضنتهن بكل حب وقالت مريم : بيبي فديتها.

عايشه: إعطيني إياها أمي
تحمل عايشه الطفله بين يديها وتبوسها في جبينها وقالت : ما شاء الله حلوه تصدقي قلت إذا ما رخصوج اليوم كنت بجيك زياره أنا وأخواني.

رقيه: هي الحمدلله رخصوني قالوا صحتي وصحة البيبي الحمد لله زينه.

سلطان : خلو أمكم تدخل وترتاح بعدين سولفوا معاها
دخلت رقية غرفتها وعايشه عطت شمعه لإختها مريم ودخل محمد وحسن غرفة أمهم ويسلمون عليها ويتحمدون لها بالسلامه.

وبعد مرور سبع سنوات وشمعه تكبر بين أهلها ودخلت المدرسة التي كان أبوها سلطان حارس بها وكان يشلها الصبح معاه وترجع معاه عند إنتهاء اليوم الدراسي.

تخرج محمد ودخل الجامعه يدرس شريعة إسلامية
تعبت رقية وصارت مريضه ومحتاجه عملية مستعجله لكن بالمستشفيات الحكومية لازم تنتظر دورها وحالتها لا تتحمل التأخير فقرر سلطان أخذها للعلاج بالخارج ولكن المبلغ الذي يحتاجه غير متوفر معاه وهو مايملك شي فقرر إنه يتسلف طلب من أخوانه ومن أهله الكل تعذر راح زياره لصديقه القديم مبارك الملقب( بالصايغ)سلطان يدخل على مبارك محل الذهب.

سلطان: السلام عليكم مبارك الصايغ.

مبارك: هلا والله بسلطان منور المحل بومحمد قرب.

سلطان: منور بصاحبه يالصايغ.

مبارك: زمان والله ماتلاقينا شو حاب تشرب؟

سلطان: ماله داعي يا مبارك.

مبارك: لا مايصير؛ يا كومار جيب ثنين شاي سليماني بسرعه.
يروح كومار بسرعه يجيب الشاي قال سلطان :وبعد طمني عليك وعلى أحوالك؟

مبارك: الحمدلله الأمور طيبه والسوق مره يرتفع وعشر مرات ينزل بس لله الحمد مستوره.

سلطان : الحمدالله أهم شيء.

دخل كومار بالشاي وحطهن بالطاوله.

قال مبارك: تفضل أشرب.

سلطان : يزيد فضلك طويل العمر جاينك بموضوع وحاب إنك تساعدني فيه.

مبارك: تفضل ياخوي ولي ربك كاتبه بيصير.

سلطان: والله أختك أم محمد مريضه ومحتاجه عملية مستعجله
مبارك: لا حول ولا قوة إلا بالله ربي يشفيها ويعافيها وكيف المستشفى بالعاصمه شو ردو عليكم.

سلطان: المستشفى بالعاصمه لابد تنتظر وقائمة الانتظار طويله وهيه محتاجه عملية مستعجله.

مبارك : الله يشفيج يا أم محمد بس شو اللي مطلوب مني أنا حاضر.

سلطان:محتاج مبلغ سلف عشان أقدر أسفرها تتعالج برا
مبارك: وكم المبلغ؟

سلطان : خمسة آلاف ريال

مبارك يسكت ويفكر وهو يطالع الطاوله وقال:إعتبر المبلغ باكر معاك.

سلطان بكل فرح:جزاك الله خير يالصايغ أنت كنت آخر أمل لي ولأم محمد وإن شاء الله وقت يتوفر معاي المبلغ بردهن لك
مبارك: نحن إخوان ولازم الأخ يفرج على أخوه.

يتبع…

This site uses cookies to offer you a better browsing experience. By browsing this website, you agree to our use of cookies.
Verified by MonsterInsights